黃金右腳」待爆升圖形

最近A股走勢比港股正氣好多，今日上證指數更抽穿30天均線，係7月8日股災以來首次，亦係近兩個月以來首次高於30天線，今日收報3928，升4.9%，且看此輪反彈能否升至7月24日4184點阻力，目前仍以反彈市看待A股較好，因為估值實在太貴。 至於港股，上周五上午明顯出現即市操作良機，講的是恒指早段升過百點，突破10天線之際，當時追入期指後仍有過百點水位獲利，不過如果坐貨過夜，今朝早無故大跌超過400點可能要被迫止蝕投降。港股陰陽怪氣，兩萬五有頗大心理阻力，後市極其量只宜小注怡情。國企指數之前回得深，幾乎迫近7月8日低位，故今日反彈力亦較強，央企重組借勢又炒過，不過質素愈差而炒得急者，高追小心中伏。 個股近日好似有得炒，原因係「災後反彈」後整固了一段時間，有心人睇住，又或者基本面較好者，拒絕二次下探。完成「高低腳」後，不少股份都守住了100天線支持，似蓄勢抽穿10天線或20天線，呢類「黃金右腳」圖型，可優先考慮，可嘗試用「過去20日高位回落最少20%或30%」去收窄範圍。